هەندرێن

ئه‌ی شه‌پۆڵگرتوو له‌ناو ده‌نگدانه‌وه‌ی بێده‌نگییدا،

کۆچه‌  نه‌بیراوه‌کان، گه‌ڕیده‌ تێپه‌ڕیوه‌کانت:

سه‌فه‌ره‌ ناوه‌کییه‌ هه‌میشه‌ییه‌کانت ‌

به‌ رووی بکوژه‌کانی دوێنێ و

تاڵانچییه‌کانی ئه‌مڕۆدا  رابگه‌یه‌نه‌،‌

که‌ دڵت به‌ که‌ڕووی ژان داده‌پۆشن.

له‌ ماڵی سروشتدا، له‌ خه‌یاڵی چیاکانه‌وه‌، به‌رد ده‌خوێنیته‌وه‌:

کانی بێده‌نگیت لێ هه‌ڵده‌قووڵێت.

له‌ ژێر مانگه‌شه‌وی هاوینی پێده‌شته‌کاندا، مه‌وداکانی خود ته‌یده‌که‌یت:

رووباری یاده‌وه‌ریی به‌ناوتدا سه‌رهه‌ڵده‌گرێ.

له‌و ئاوه‌ڵابوونه‌دا رووتده‌بمه‌وه‌:

بۆ: سه‌رابی چیا

س

 تۆ له ئامێزی شه‌به‌نگی ته‌نیاییه‌کی

شکۆمه‌نددا،

که‌ به‌ ده‌م توانه‌وه‌ی ژانی بیرهاتنه‌وه‌کانه‌وه‌

له‌ناو چاوه‌ بێخه‌وه‌کانمدا ده‌توێیته‌وه‌،

وه‌ک سه‌رابێکی راماو

شه‌پۆڵی چرپه‌کانت،

له‌ باوه‌ش ده‌گرم.

"شه‌وی یه‌ڵدایه‌، یا ده‌یجووره‌ ئه‌مشه‌و

که‌ دیده‌م دوور له‌ تۆ بێ نووره‌ ئه‌مشه‌و

نالی

به‌ تامه‌ زه‌مزه‌مییه‌کانی بێهووده‌یی

دوا ساتان ئاوێزانیت.

سه‌رت جێ نزرگه‌ی پاکانه‌ی گومانه‌ و

له‌ نێو ختۆکه‌ی هزره‌ گوناهه‌کاندا خپ ده‌بی،          

ته‌می ته‌مننا ده‌تنووسێته‌وه‌  

دیارییه‌کی به‌خشنده‌ی به‌خشراوه‌.

عه‌ده‌مێک، که‌ به‌ لاواندنه‌وه‌ی خۆیه‌وه‌ سه‌رقاڵه‌،

مه‌رگێکی بێناو و بێڕه‌نگه‌.

ئه‌رێتیی و نه‌رێتی،

وه‌ک بوونی نه‌ بوونه‌.